ပြည်သူချစ်သော ကဗျာဆရာ

(သရုပ်ဖော် ပန်းချီ မျိုးမြင့်)

ဆေးလိပ်လည်းတို

နေလည်းညိုပြီ

ငါ့ကို အိမ်ပြန်ပို့ကြပါလေ

ကဗျာခေါင်းစဉ်က “ဧည့်သည်ကြီး” တဲ့.........................
ကဗျာဆရာမည်သူဖြစ်မည်ကိုတော့ ပြောစရာလိုမည်မထင်။
ကျနော် သူ့အကြောင်းရေးချင်သည်။ သို့သော် သိပ်မသိ။ ကျနော် သူ့ကဗျာတွေအကြောင်းရေးချင်သည်။ သို့သော် ကျနော့်အတွေးနုနုဖြင့် သူ့ကဗျာတွေကိုဆန်းစစ်လျှင် ကဗျာဆရာသိက္ခာကျမည်ကို စိုးရိမ်သည်။ ကျနော် မ၀ံ့ရဲ။ ဒါပေမယ့် သူ့အကြောင်း၊ သူ့အတွက် တခုခုကို ကျနော်ရေးချင်နေသည်လေ..........................

ပညာရေးဝန်ကပင် တက္ကသိုလ်တွင်ရှာခဲ့ရသည်အထိ ဆယ်တန်းစာမေးပွဲတွင် မြန်မာစာစီစာကုံးအရေးအသားကောင်းလှသော ကျောင်းသားလေးတယောက်....................

သူတက်သည့်အခမ်းအနားတခုတွင် သူဖြတ်လျှောက်ရာလမ်းတလျှောက် ပရိသတ်များကမတ်တပ်ရပ်အရိုအသေပြုကြသည်မှာ တယောက်ထလိုက်၊ တယောက်ထိုင်လိုက်ဖြင့် လူလှိုင်းလုံးကြီးသဖွယ် ဖြစ်နေရလောက်အောင်ပင် ပြည်သူ၏မေတ္တာ၊ ရိုသေလေးစားမှုကို ခံယူခဲ့ရသည့် ကဗျာဆရာ......................

စစ်အစိုးရလက်အောက်မှ ပြည်သူ၏ဒုက္ခအဖုံဖုံကို ကဗျာများဖြင့် ကွက်ကွက်ကွင်းကွင်းမြင်အောင် ရေးနိုင်စွမ်းရှိသော ကလောင်စွမ်းထက်လှသည့် ကဗျာဆရာ.............................

ထိုကဗျာဆရာသည် သူပြန်ချင်လှသောသူ့တိုင်းပြည်၊ သူချစ်သောမြန်မာပြည်သူများကို စွန့်ခွာထားခဲ့သည်မှာ သုံးနှစ်တင်းတင်းပြည့်ခဲ့လေပြီ။

ဧည့်သည်ကြီးကဗျာကို မည်သည့်အချိန်ကတည်းက အလွတ်ရနေမှန်း ကျနော်မသိ။ မည်သူရေးသည်ကိုလည်း ထိုအချိန်ကကျနော်မသိခဲ့။ အရွယ်နည်းနည်းရလာတော့ ကဗျာအဓိပ္ပါယ်၊ ကဗျာဆရာ၏ခံစားချက်ကို ရေးရေးလေးမျှ နားလည်သလိုရှိခဲ့သည်။ ကဗျာပိုင်ရှင်ကို သိချင်လာခဲ့သည်။ ထို့နောက်ပိုင်းတွင်တော့ ကဗျာဆရာကို ကျနော်ခြေရာခံလိုက်ခဲ့သည်။ စာအရမ်းဖတ်သော သူငယ်ချင်းတယောက်က ကဗျာဆရာတင်မိုး(ဘဘဦးတင်မိုး)၏ ကဗျာဖြစ်ကြောင်းပြောလာမှ ကျနော်သိခဲ့သည်။ သူ့အကြောင်း၊ သူ့ကဗျာများကို ပန်းဆိုးတမ်းစာအုပ်အဟောင်းဆိုင်များတလျှောက် ကျနော်ရှာခဲ့သည်။ ဖန်မီးအိမ်ကဗျာများကို ကျနော်ဖတ်ခဲ့ဖူးသည်။ ထို့နောက် မြန်မာပြည်ပြင်ပသို့ရောက်မှ သူ့ကဗျာတော်တော်များများကို ကျနော်ဖတ်ခဲ့ရသည်။

ကျနော် ကဗျာကိုချစ်သည်။ ထို့ထက်ပို၍ သူ့ကဗျာများကို ကျနော်ချစ်သည်။ သူ့ကိုကျနော်ရိုသေလေးစားသည်။ စစ်အစိုးရအကျဉ်းထောင်ထဲ၌ သူနှင့်တွေ့ဆုံခဲ့ကြသော ကျနော့် ညီအကိုများက သူ၏စိတ်နေသဘောထားကောင်းလှပုံကို ပြန်ပြောပြကြသည့်အခါ သူ့ကိုကျနော်အရမ်းတွေ့ချင်ခဲ့သည်။ အသက်နည်းနည်းငယ်ခဲ့သော၊ ထောင်မကျခဲ့ရသော ကျနော့်ကိုယ်ကျနော်ပင် မကျေမနပ်ဖြစ်ခဲ့မိသည်။ အဲဒိလောက်ထိ သူ့ကိုကျနော်တွေ့ချင်စိတ်ပြင်းပြခဲ့သည်။ သို့သော် လွန်ခဲ့သည့်သုံးနှစ်က သူဆုံးပြီဆိုသည့်သတင်းသည် ကျနော့်ဆန္ဒများကို သဲထဲရေသွန်ဖြစ်စေခဲ့သည်။ ကျနော့်ဆန္ဒ မည့်သည့်အခါမှ ပြည့်တော့မည်မဟုတ်ဟု ယူကြုံးမရဖြစ်ခဲ့သည်။

သူကွယ်လွန်ခဲ့ပြီဖြစ်သော်လည်း သူနှင့်သူ့ကဗျာများသည် ကျနော့်ရင်ထဲတွင် ကျနော်သေဆုံးချိန်အထိ ရှင်သန်နေမည်မှာသေချာသည်။ ထို့အတူ မြန်မာပြည်သူများ၏ ရင်ထဲ၌လည်း သူရှိနေမည်ဖြစ်သည်။

ဘဘဦးတင်မိုး ကောင်းရာသုဂတိလားပါစေ.................................

ဘဘဦးတင်မိုးရေ............
ကျနော်တို့တတွေကတော့
ဆေးလိပ်တတိုနဲ့
နေအညိုကိုစောင့်တုန်း..................

ဦးတင်မိုး အတ္ထုပ္ပတ္တိ

ဦးတင်မိုးကဗျာများ